أبرة التخدير

تعبت أطرد الهاجوس من سرمد التفكير
واكفّر عن ذنوبه هدايا من أتعابي

تعبت أعطي الآهآت واجزل له التكفير
ثنايا الهموم ان كشّرت نابها نابي

تعبت أجمع الأحزان من عالم التبذير
اللي نثره الوقت في سكة ركابي

مع الواقع القاسي حسب لعبة التكشير
يغيب الالم لاغابت الشمس بثيابي

تحركني اصباع الندم لحظة التعبير
وتطيح الحروف اللي جمعته من غيابي

ويعميني غبار المآسي بلا تبرير
مجرد عبوس الطير يسبح مع اسرابي

طاحت من يدين الزمن أبرة التخدير
صحى الواقع المؤلم على غفوة اهدابي

وعلى هامش الأحلام في عالم التفسير
مال للأمل معنى ؟اذا صار مرتابي

وانا حلم عمري صنفته الليالي غير؟
عابر سبيل امآل ضاعت من احبابي

يمر العطش ريقي على طاري التذكير
ويشرب خطاي اللي ذكرته من اسبابي

يكفخ من اغصان التعب كل شيء يطير
وتعانقه دوحت همومي على بابي

من اول بدايات الهوى يوم كنت صغير
مامر يومٍ صار بعضه من اصحابي

اقدّر كثير احباب واعرف وش التقدير!
وأكثر خطاياهم كانت على حسابي