مواطن . مع . برنت

الـكسر ماهـو كسر تلـعـات الأرقـاب
الـكـسر والله كـسر الأحـلام يابـنـت

كانـت بداية حـلــم سلهم بالأهـداب
وقام يتـغـنـج قلـت ياحظي أحسنت

وفجأة ظـلامي كسّر الظل بغـياب
ورجعـت خالي وفضتي مثلـما كنت

تـدرين وإلا أقـول: بفـتح لك أبواب
بـضلوع صدري يوم انا فيـك آمنت

بين الخـيـال وبيني الـشعر ينساب
يمكن أبالغ بعـض الأحـيان لا مِنت!!

انا وحـيــد وغربتي مـاله أسـبـاب!
في رحـم عمري من حنيني تكوّنت

بنيت لي في عـزلة النفـس محراب
أقرأ سـكوني كلما ضقت وأشجـنت

وأزرع بـذور الـفـقـد عـنّـاب عـنّـاب
وتجنيني الخطوة على سكة العنت

والمس رياحـيـن الأمل تصبح تراب
من فوق جرحي غيم الألام عينـت

تمطرني الفكرة شجن وأكتب عتاب
وبيني وبيني يقسي الحرف لا لنت

وأعلن غـيابي وأمـتطي ليلي ركاب
والشمس تمسحني ولاكأني أعلنت

ألغيت مـن جدول عناء وقتي أتعـاب
ولقيتني في هامـش الدرب هيجنت

عالجت في جـرح المشاعر ولاطـاب
حـاولـت يامــا للآـسف ما تـمـكـنـت

نعـم قـديـم الحزن يكـتبني كـتاب
وبالعــمـر صفحاته من الوجد لونت

حتى نهاري يـشـبه وجيه الأصحاب
لكن سـواده في نواياه لا أمعـنـت!!

يـومه عـرفت إن القدر زرقة حِـراب
والـشك مايمطر سحابه وانا أيقـنت

يعـني كذا بالمختصر رحـلة أغـراب
بالضبط .. لكنّي غريب وتوطـنـت!!