مدينة حب

انتي مدينة حب وأشواق ودروب
كله تؤدي للهدوء والسكينة.؟!!
//
انتي بساتين الفرح فُل وطيوب
وإحساسي الرائع بقلبي حنينه
\\
كم قلت في نفسي ابا توب ما توب
وترجع بي الأحلام لأجمل سنينه.؟!!
//
واجيك في كفي ثمن عمر مغلوب
يطيح بينك كل لحظة وبينه.؟!!
\\
اهواك احبك اعشق أنفاسك اذوب
وقلبي بحبك كل شيءٍ يدينه.؟!!
//
من رعشة إحساسي بنشوته متعوب
وإمن الوله طاح الصبر من يدينه .؟!!
\\
جسر الآماني دايم الدوم منصوب
وفي خاطري لك كل قصر ومدينة.؟!!
//
من صوب حبك والوله صار من صوب
كل المشاعر في يدينك رهينة.؟!!
\\
اترجمك واقراك عدلٍ ومقلوب.؟!!
واسبر معانيك الجزال الثمينة
//
وافهم عيونك كلما سلهمت نوب
إن الغلا لا نام في محجرينه.؟!!

ضياع الأماني

في ظلمة أحياني قناديل الأحلام
تضوي بتفسيره على عمر ثاني.
|"|
ويطوف بي جنح الأمل عدّت اعوام
وانا مع هموم الزمن في مكاني.
|"|
من عادت الدنيا دواليب الايام
تطوف وأحلام العمر في ثواني
|"|
محروم والمحروم يشبه للأيتام
في عنصرية فكر واقع اناني.
|"|
من يستبيح العذر لسيوف الأوهام
لا عاث في روحي فساد الأماني.
|"|
تبخّرت في صفحتي بيض الأقلام
ماعاد باقي غير سود المعاني.
|"|
وطيوف تكتب قصتي يوم الإلهام .
يزورني وغصين الأحباب داني.؟!!

مسمار النوى

ترعد وتبرق والمشاعر يتيمة
وانا وبعض الذكريات ابتلشنا
|"|
وبين إنتظاري والنوايا السليمة
هبت لواهب خاطري من عطشنا
|"|
والله لو .. للوقت معنى وقيمة.؟!!
في حب غيرك ما اعتقد فيه طشنا
|"|
انت فضاء روحي وانت سديمة
ومعك العمر لوكان يومين عشنا
|"|
صحيح ما احب بـ غلاك الهزيمة
لو إن حرب البعد منها ارتبشنا!!
|"|
ومع ذا لو إن الحرب دايم لئيمة
مادق مسمار النوى في نعشنا.!!
|"|
ابعد مسافات الدفء يا يتيمة.؟!!
سحاب وجدك لا هطل وإنتعشنا
|"|
واقرب مسافات البٌعد ألف غيمة
حصادها زرع المواجع .. وحشنا